يا تيتا يا خيتيارا..

- يا تيتا صورني صورة مع امك الله يرضى عليك,يسلملي شابيبك

- ولو يا تيتا! تكرم عينك

-يخليلي يإك يا تيتي نييال اهلك فيك وبهانيون عا هل تربايي لك والله خلقتك بتفتح القلب

-هههه.. ليك مرسي ...يطول عمرك يا ستي.. طب يللا وقفوا تصوركم..إيه برافو تمام

-صورت؟

-إيه مشي الحال

-أكيدي؟ لأن ماشفتها ضوت..يعني لا تواخزني يا ستي عم عزبك معي

-لاه ولو يا تيتا لا تقولي هيك.. بس خلص صورت..مشي الحال, بدك تشوفيها؟

-رزق الله عا ايام يللي كنا ننزل فيها عالمديني ت نتصور.. ليك هل ايام يللي وصلنالها صرت بتصور وبتشوف الصورة بالدقيقة ذاتها

-هيهي إيه.. عجبتك؟

-شو هيدا يا ستي؟! مني آشعا غير شي أسود وخيالات! روق ت جيب عويناتي..

جابت العوينات وبعد طول عذاب مع الكاميرا..وعدة محاولات تقريب وتبعيد..ماقدرت الخيتيارا تقشع بس هزت برأسها وقالت " يسلم داييتك يا ستي,انشالله منتصور أحلى صورة لما نفرح فيك عريس"